Falt i sjøen, redda seg i land

 Nyhende  Innspel avslått på Falt i sjøen, redda seg i land
aug 082018
 

77-åringen Magnus Stangeland har falt iver bord på denne Tobias-sjarken, men redda seg i land etter lang tid i sjøen. Foto: Kathrine Klepsvik Lønøy.

Magnus Stangeland (77) vart funnen på Fugløy etter at han vart meldt sakna og tobiasen hans vart lokalisert tom med motoren i gang.

 

Politiet i Austevoll vil ikkje stadfesta at det var Magnus Stangeland som vart funnen etter ein intensiv leiteaksjon onsdag. Marsteinen får det likevel stadfesta frå andre kjelder, og Bergens Tidende slår òg fast at det dreiar seg om Stangeland.

– Han har gått ut frå Sørvik tysdagskveld, og hamna i vatnet medan båten har vore kopla i framover. Etter det eg forstår, kan han ha vore i sjøen i inntil ein time, og lete seg driva med sjøen inntil han har makta å komma seg inn i Fugløyvågen, seier Nordstrand til Marsteinen.

Magnus Stangeland er oppvaksen i Sørvik på Stolmen, og kjenner farvatna i området særs godt. I tillegg han ein særs habil symjar i ungdommen. Han skal òg ha vore symjeinstruktør i Sjøforsvaret som ung mann.

– Det var ein lokal fiskar som lokaliserte både båten og den sakna sjølv. Han var kald etter tida i sjøen og frå å ha vore med våte klede på Fugløya heile natta og morgonen, seier Per Nordstrand i Austevoll-politiet til Marsteinen.

Hos Helse Bergen har Magnus Stangeland i går ettermiddag fått statusen lettare skadd etter det strabasiøse døgeret.

Av Trond Hagenes

PETIT: Kor er alle heltar hen?

 Nyhende  Innspel avslått på PETIT: Kor er alle heltar hen?
aug 072018
 

Redaktøren har mimra etter ein alle tiders konsert.

Så sit ein her, meir eller mindre på middagshøgda i livet. Gift, med einebustad, to barn, el-bil (alternativ til stasjonsvogn) og golden retriever. Ein kunne like gjerne ha blitt spydd ut frå ein eller annan Norsk skog-fabrikk i 80 gram, i rektangulær form med dei strategiske måla 210 x 297 millimeter. I takt med at eg er vorten eldre, forsvinn òg desse menneska ein har sett opp til. Forfattarar døyr, og dei nye likar eg berre, det er ikkje slik at dei går på vatnet. Fotballspelarar legg opp, og no klarar eg meg med å lika Paul McGrath sine Instagram-postar, sjølv om eg kommenterte ”devine” på ein av dei. Til informasjon har han framleis kallenamnet God.

Så er det musikarane, dei òg er vortne eldre, nokre gebrekkelege. Prince, Syd Barrett, David Bowie har alle skifta ut plektra sine med harpe, medan folk som Shane McGowan frå The Pogues ser ut til å ha blitt impregnert av whiskey (og dermed vera udødeleg). Dessutan har han fått nye tenner. Sjølv om eg har solide tenner og berre ein sjeldan gong kan tenkja meg å skylja noko sterkare enn raudvin ned i ganen, fekk eg smaken på tekstane og den irske tonane kring juletider i 1987. Seinare såg eg dei britiske irane live både i Bergen og i London. Shane hadde fått sparken, og vart erstatta fyrst av Spider Stacy, men i London-konserten i 1994 kom både Shane og vikaren Joe Strummer på scena. Strummer, God rest his soul, vart legendarisk med The Clash då pønken skylde over Storbritannia på slutten av 1970-talet.

I ungdomsskuletida hengde eg over stereoen, og Pandoras Jukebox var fast høgdepunkt på radioen. Ikkje eit besøk i Bergen utan at siste utgåve av musikkavisene Beat og Puls vart plukka opp … Slik sett var det òg naturleg at å besøkja storebror i Skottland, der han studerte òg kunne resultera i ein konsert. 14 år gamal sat eg dermed i ein konsertsal ved elva Clyde og høyrde på slidegitaren til den då 41 år gamle Ry Cooder. Ja, han med filmmusikken frå Paris, Texas og ein og annan utypisk 70-talshit slik som Little Sister og han var i alle fall delvis ansvareleg for å få dei kubanske musikarane i Buena Vista Social Club fram i lyset for 20 år sidan … 30 år seinare kunne eg konstatera at helten i eigen fulle person slo an tonen på Notodden bluesfestival. Konsertarenaen minna om ein Rubb-hall på steroid, men lyden var god og 71-åringen såg verken ut til å ha gløymt verken tekst eller akkordar. Sjølv om jan Eggum i si tid spurde det obligatoriske spørsmålet, kor er alle heltar hen, var i alle høve adressen Hovigs hangar, Notodden førre torsdag.

TrH

– Ville vore ein dårleg skurk

 Nyhende  Innspel avslått på – Ville vore ein dårleg skurk
aug 022018
 

Bjarte Haugland har kjøpt leilegheit i same hus som det tidlegare var fødestove og han vart fødd. Her kan han nyta utsikta mot havet, og stemninga i rommet har vorten mykje betre etter at kjærasten Cathrine kom inn i biletet. (Tekst og foto: Maria Vassnes)

Bjarte Haugland er ein lidenskapleg kortspelar, syng i band og er ein aktiv fotball-supporter. At han manglar ein arm har aldri vore noko hindring.
– Det har tvert imot vore ein icebreaker og fungert som inngangsbillett til mange fine samtalar, fortel han i sommarpraten. 
– Eg har aldri følt meg handikappa, men heller sett på det som ein fordel. Det einaste er at eg ikkje kunne vorte ein god skurk, då det er lett å kjenna meg igjen, spøkjer Haugland. 

 

Les heile sommarpraten i Marsteinen

Bubil-livet gjev fridom

 Nyhende  Innspel avslått på Bubil-livet gjev fridom
aug 022018
 

Trond er sjåføren av dei to, medan Bente har oppgåva som kartlesar. Det er likevel ikkje alltid dei endar opp der dei hadde tenkt. (Tekst og foto: Kathrine Klepsvik Lønøy)

Ei bubilbølgje herjar landet, og mengda bubilar på vegane aukar. Trond Håvard og Bente Haugland har sidan dei fekk sin fyrste bubil reist rundt i både Noreg og Europa saman med dei to hundane sine.

På turane har dei fått med seg mange unike opplevingar.
– Om me køyrer feil i eit kryss så gjer ikkje det noko. Me kjem sikkert til ein fin plass likevel, fortel dei. Sjølv om dei merkar veksten av bubilar godt, er det alltid råd å finna ein stad der dei kan parkera.
– Me treng stort sett berre ein flat plass å stå.
Turismen er viktig for Austevoll, men det er i dag ingen tilrettelagt bubil-plass her. Visit Austevoll lovar at dette er på veg.
– Me har fått øremerkte midlar frå kommunen til bubil-turismen i Austevoll, seier Asta Johannessen og fortel om den nye bubil-plassen som skal koma i Leirvikja i Bekkjarvik. Her vert det tilgjengeleg straum, vatn og tømmestasjon for bubilane.

 

Les heile saka i Marsteinen

 

Lever ut draumen

 Nyhende  Innspel avslått på Lever ut draumen
aug 022018
 

Carolin Storebø og Arnviòur visar fram vinnarsløyfa og beviset for fyrsteplassen i Noregsmeisterskapet. (Tekst og foto: Maria Vassnes)

Carolin Storebø arbeider turnus i Nordsjøen og brukar mesteparten av fritida si saman med store firbeinte vener frå Island. Ho er viss på at hardt arbeid lønnar seg, og vart denne månaden noregsmeister under NM for islandshest i Grimstad.
– Det var veldig stort! Eg hadde eigentlig ikkje tenkt å melda meg på, og vart med i siste liten, fortel Carolin då Marsteinen besøkte garden på Fitjar.

 

Les meir i Marsteinen

Reinsefisk for framtida

 Nyhende  Innspel avslått på Reinsefisk for framtida
aug 022018
 

Lærling Steffen André Skår trivst godt med stell av dei små krabatane. Dette eksemplaret er flytta frå yngelstasjonen, og blir i denne avdelinga til han er om lag ti gram. Deretter ventar dei store tankane inne i hovudhallen. (Tekst og foto: Trond Hagenes)

Austevoll rensefisk har flytta inn i nybygg ved Tråvika. Her er den fyrste generasjonen eigenklekka rognkjeks i ferd med å veksa opp.
– Desse fiskane er våre eigne babyar, smilar dagleg leiar Leif Gøran Skår.
Saman med lærlingen Steffen André Skår skodar han ned i karet der dei små krabatane sym rundt. 

 

Les heile saka i Marsteinen

Tjuvar stal krabbeteiner

 Nyhende  Innspel avslått på Tjuvar stal krabbeteiner
jul 272018
 

Arnstein Birkeland oppmodar tjuvane til å leggje krabbeteinene tilbake.

Kvart år er det nokon i Austevoll som får teinene sine stolne. Denne gongen var det Arnstein Birkeland som vart det uheldige. 

Nede ved naustet på Bakkasund sit Arnstein Birkeland klar til å nyta ein god krabbemiddag med familie og vennar. Sjølv om det vart skaffa nok krabbar til dette måltidet, vert det med ein bismak. Av dei tre teinene han hadde skaffa seg til sommaren, er det berre ei igjen.
– Eg hadde tre gode krabbeteiner liggjande ute. Då eg skulle henta dei inn att, stod det berre ei igjen, fortel Birkeland irritert.
– Teinene var godt merka med både namn, telefonnummer og adresse. Dei kosta 800 kroner per stykk og var heilt nye, så sjølvsagt det er frustrerande å mista dei så snart.

Eit kjent problem
Politibetjent Vidar Mjåtvedt, fortel at dette er eit kjent problem i Austevoll.
– Dette er sjølvsagt veldig kjedeleg for folk å oppleva. Ein må få lov til å fiska med det utstyret ein har i fred.
Han forklarar at det ikkje er enkelt å finna ut av kven som har gjort dette og at ei slik sak vil nok ikkje bli høgt prioritert.
– Men har me mogelegheit til å finna det ut, vil dei sjølvsagt bli tekne og få si straff.

Birkeland har ein klar beskjed til tjuvane.
– Eg håpar dei som har teke dei sit med dårleg samvit. Til dei har eg berre ein ting å seia: Legg teinene tilbake der du fann dei, krabbane kan du få behalda.

Av Kathrine Klepsvik Lønøy

– Skal ikkje sjå slik ut

 Nyhende  Innspel avslått på – Skal ikkje sjå slik ut
jul 272018
 

Det ser langt frå delikat ut på rasteplassen, som berre er elleve år gamal.

Rasteplassane ved Storholm- og Austevollsbrua manglar vedlikehald. Villnisset har fått breia om seg, og søppelet flyt. Vegvesenet konstaterer at det ikkje skal vera slik.

 

– Slik som dette skal det ikkje sjå ut. Bosspanna skal verta tømde, det skal ikkje flyta rundt i vegarealet og grøntarealet skal klyppast, skriv byggjeleiar Morten Solholm i Statens vegvesen til Marsteinen.

Rasteplassane i Austevoll skal ha vorte utegløymde i kontrakten for vegvedlikehald som låg føre for nokre år sidan. Deretter har det ikkje vore semje om pengebruken for å oppdatera rasteplassane. Solheim opplyser om at han ynskjer å sjå nærare på om rasteplassen ved Austevollbrua kan oppdaterast våren 2019, slik at han då vil sjå ut slik han var meint å ta seg ut.

Continue reading »

Fiskarar på ungdomskvote

 Nyhende  Innspel avslått på Fiskarar på ungdomskvote
jul 262018
 

Systrene Ingeborg (12) og Heidi Marie Kolbeinshavn (13) nyttar sommardagane på sjøen. Gjennom ungdomsfiskeordninga har dei fått sommarjobb som fiskarar. (Tekst og foto: Kathrine Klepsvik Lønøy.)

Ungdomsfiskeordninga gjev mange unge austevollingar ein smakebit på fiskaryrket. Om det er fiskarar Ingeborg og Heidi vil bli er dei usikre på, men det er ingen tvil om at dei stortrivst i sommarjobben sin. 

 

Les heile saka i Marsteinen.